Mama

Un ser bendishoná ku a sinti doló pa ponebu na mundu,
ta priva su mes di dibertishon,
pa kuida un ser presioso.

Ku a pèrdè soño,
sali for di proporshon i subi di peso,
keda sin kumpra algu p’e mes, pa e komplasé abo.

Kada bes ku bo yora
kuminda na boka.
Tur ora ku bo susha,
limpiabu mesora.

Mama, no tin pa igual’é,
nunka lo bo por paga molèster,
ni amor ku E a ofresé.

P’esei dun’é su balor ora e ta na bida,
pa abo por bisa ora e sosegá,
ku trankilidat i satisfakshon den bo kurason
... ami si a stima i kuida mi mama!

Saká for di buki di poesia Divino 2
Outor Bianca Neman