Fuentenan di konfushon

Aki ta papia Wan Pueblo.

Mi ta lesa korant
mi ta skucha radio
mi ta wak televishon
pa mi keda informá
pa mi keda na altura
i tambe keda al tantu
di tur akontesimentu
i di kalke suseso
den nos komunidat.

Ku pena den mi kurason
i ku un mente konfundí
mi ta tende di nos Lider Máksimo
ku ta guia nos pueblo
ku ta nos ehèmpel mayó
i ku mi ta respetá mashá
ku medionan di komunikashon
ta fuentenan di konfushon.

Awor klarami si mi ta kibuká:
si diferente medio di komunikashon
bisa meskos tokante di un tópiko
anto esaki no ta e bèrdat
nos por papia di un kòmplòt.

Den e kaso akí mi tin un solushon:
dekretá ku medionan di komunikashon
ta duna solamente informashon
outorisá pa nos Lider Máksimo
pa kita tur konfushon.

Danki.

Kompader